Шеърҳо бо теги: рубоӣ
Шеърҳои марбут ба теги «рубоӣ» дар сомонаи «Шоирон».
Мураттабкунӣ: навтарин аввал
Дар кӯи ту ман сӯхтадоман будам,
Дар кӯи ту ман сӯхтадоман будам, В-аз оташи ғам сӯхтахирман будам. Оре, ҷоно, дӯш ба бомат будам, Гуфтӣ: Дузд аст. Дузд набуд, ман будам.
Ҳаргиз набувад шикасти кас мақсудам,
Ҳаргиз набувад шикасти кас мақсудам, Озурда нашуд зи ман диле, то будам. Сад шукр, ки чашми айббинам кӯр аст, Шодам, ки ҳасуд нестам, маҳсудам.
Ман аз ту ҷудо набудаам, то будам,
Ман аз ту ҷудо набудаам, то будам, Ин аст далели толиъи масъудам. Дар зоти ту нопадидам ар, маъзурам, В-аз нури ту зоҳирам агар, мавҷудам.
Умре ба ҳавас боди ҳаво паймудам,
Умре ба ҳавас боди ҳаво паймудам, Дар ҳар коре хуни ҷигар полудам. Дар ҳар чӣ задам даст, зи ғам фарсудам, Даст аз ҳама боздоштам, осудам.
Он дам, ки ҳадиси ошиқӣ бишнудам,
Он дам, ки ҳадиси ошиқӣ бишнудам, Ҷону дилу дидаро ба ғам фарсудам. Мепиндоштам, ошиқу маъшуқ дуянд, Чун ҳар ду якест, ман худ аҳвал будам.
Онон, ки ба номи нек мехонандам,
Онон, ки ба номи нек мехонандам, Аҳволи даруни бад намедонадам. Гар з-онки дарун-бурун бигардонандам, Муставҷиби онам, ки бисӯзонандам.
Андар талаби ёр чу мардона шудам,
Андар талаби ёр чу мардона шудам, Аввалқадам аз вуҷуд бегона шудам. Ӯ илм намешунид, лаб бар бастам, Ӯ ақл намехарид, девона шудам.
Гар хок туӣ, хоки туро хок шудам,
Гар хок туӣ, хоки туро хок шудам, Чун хоки туро хок шудам, пок шудам. Ғам сӯи ту ҳаргиз гузаре менакунад, Охир чӣ ғамат, аз он ки ғамнок шудам?!
Андӯҳи ту аз дили ҳазин медуздам,
Андӯҳи ту аз дили ҳазин медуздам, Номат зи забони ону ин медуздам. Меноламу қуфл бар даҳон мефиганам, Мегиряму хун дар остин медуздам.
Удам чу набуд, чӯби бед овардам,
Удам чу набуд, чӯби бед овардам, Рӯи сияҳу мӯи сапед овардам. Чун худ гуфтӣ, ки ноумедӣ куфр аст, Фармони ту бурдаму умед овардам.
Ҳарчанд ба сурат аз ту дур афтодам,
Ҳарчанд ба сурат аз ту дур афтодам, Зинҳор мабар зан, ки шудӣ аз ёдам. Дар кӯи вафои ту агар хок шавам, З-он ҷо натавонад, ки рабояд бодам.
Дерест, ки тири фақрро омоҷам,
Дерест, ки тири фақрро омоҷам, Бар торами афлоки фалокат тоҷам. Як шамма зи муфлисии худ баргӯям, Чандонки Худо ғанист, ман мӯҳтоҷам.
Ҷоно, ману ту намунаи паргорем,
Ҷоно, ману ту намунаи паргорем, Сар гарчи ду кардаем, як тан дорем. Бар нуқта равонем кунун чун паргор, Дар охири кор сар ба ҳам боз орем.
Гар ман гунаҳи ҷумла ҷаҳон кардастам,
Гар ман гунаҳи ҷумла ҷаҳон кардастам, Афви ту умед аст, ки гирад дастам. Гуфтӣ, ки ба рӯзи аҷз дастат гирам, Оҷизтар аз ин махоҳ, к-акнун ҳастам.
Ҳам дар раҳи маърифат басе тохтаам,
Ҳам дар раҳи маърифат басе тохтаам, Ҳам дар сафи олимон сар андохтаам. Чун парда зи пеши хеш бардоштаам, Бишнохтам, ки ҳеч нашнохтаам.
Гар пора кунӣ маро зи сар то ба қадам,
Гар пора кунӣ маро зи сар то ба қадам, Мавҷуд шавам зи ишқи ту ман зи адам. Ҷоне дорам, зи ишқи ту карда рақам, Хоҳиш ба шодӣ кушу хоҳиш ба ғам.
Ранҷураму дар дил аз ту дорам сад ғам,
Ранҷураму дар дил аз ту дорам сад ғам, Бе лаъли лабат ҳарифи дардам ҳама дам. З-ин умр малулам мани мискини ғариб, Хоҳад шавад оромгаҳам кӯи адам.
Бо аҳли замона ошноӣ мушкил,
Бо аҳли замона ошноӣ мушкил, Бо чархи куҳан ситезароӣ мушкил. Аз ҷону ҷаҳон қатъ намудан осон, Дар ҳам задани дил ба ҷудоӣ мушкил.
Дар ишқ чӣ беҳ зи бурдборӣ, эй дил,
Дар ишқ чӣ беҳ зи бурдборӣ, эй дил, Гӯям ба ту як сухан зи ёрӣ, эй дил. Ҳарчанд расад зи ёр хорӣ, эй дил, Зинҳор ба рӯи ӯ наёрӣ, эй дил.
Чандат гуфтам, ки дида бардӯз, эй дил,
Чандат гуфтам, ки дида бардӯз, эй дил, Дар роҳи бало фитна маяндӯз, эй дил. Акнун ки шудӣ ошиқу бадрӯз, эй дил, Тан дардиҳу ҷон кану ҷигар сӯз, эй дил.
Гар бо ғами ишқ созгор ояд дил,
Гар бо ғами ишқ созгор ояд дил, Бар маркаби орзу савор ояд дил. Гар дил набувад, куҷо ватан созад ишқ, В-ар ишқ набошад, ба чӣ кор ояд дил?
Меруст зи Дашти Ховарон лолаи ол,
Меруст зи Дашти Ховарон лолаи ол, Чун донаи ашки ошиқон дар маҳу сол. Бинмуд чу рӯи дӯст аз парда ҷамол, Чун сурати ҳоли ман шудаш сурату ҳол.
Дар боғ куҷо равам, ки нолад булбул,
Дар боғ куҷо равам, ки нолад булбул, Бе ту чӣ кунам ҷилваи сарву сунбул. Ё қадди ту ҳаст, ончи медорад сарв, Ё рӯи ту ҳаст, ончи медорад гул.
Шайдои туро рӯҳи муқаддас манзил,
Шайдои туро рӯҳи муқаддас манзил, Савдои туро ақли муҷаррад маҳмил. Сайёҳи ҷаҳони маърифат, яъне дил Дар баҳри ғамат даст ба сар, пой ба гил.
Пурсид касе манзили он меҳргусил,
Пурсид касе манзили он меҳргусил, Гуфтам, ки: Дили ман аст ӯро манзил. Гуфто, ки: Дилат куҷост? Гуфтам: Бари ӯ, Пурсид, ки: Ӯ куҷост? Гуфтам: Дар дил.