Шеъри ман гоҳвори ишқи шумост,
Шеъри ман гоҳвори ишқи шумост,
Кӯдаки чашмчори ишқи шумост.
Соз такрору сӯз нотакрор,
Пайрави тозакори ишқи шумост.
Қаҳ-қаҳи талху нам-нами ширин,
Хандаи ашкбори ишқи шумост.
Ё нафас, ё сукут, ё фарёд,
Ё ҳаво, ё фишори ишқи шумост.
Охирин барги сабзи фасли хазон-
Ёдгори баҳори ишқи шумост.
Шеъри ман ҳамчу машъали ҷовид
Зинда андар мазори ишқи шумост.