457. Номаи Кайхусрав ба Ковус ба Навиди Фирӯзӣ

Дабири писандидаро пеш хонд, Сухан ҳар чи боист, бо ӯ биронд. Сари нома кард офарин аз нахуст Бар –он, к-ӯ замин аз бадиҳо бишуст. Сари ҷодувонро нагунсор кард, Чунон ахтари хуфта бедор кард. Тавоноиву донишу дод аз ӯст Ба ҳар ҷо ситамёфта шод аз ӯст. Дигар гуфт, к-аз бахти Ковусшоҳ Бузурги ҷаҳондидаи некхоҳ. Кушода шуд ин ганги Афросиёб, Сари бахти ӯ андаромад ба хоб. Ба як размгаҳ аз набардасарон Сарафроз бо гурзҳои гарон. Ҳамоно ки афканда шуд чил ҳазор Ба Гулзарриюн дар сафи корзор. В-аз он пас баромад яке боди сахт, Ки барканд бо шох бехи дарахт. Ба об-андар афканд чандин сипоҳ, Ки ҷустанд бар мо ҳаме дастгоҳ. В-аз он ҷойгаҳ рафт ба Б-ҳиштганг, Ҳисоре пур аз мардуму ҷои ҷанг. Ба ҷанги ҳисор-андарун сӣ ҳазор Ҳамоно, ки шуд кушта дар корзор. Ҳамон буд, ки бедодгар буд мард, Варо донишу бахт ёрӣ накард. Ҳама рӯи кишвар сипаҳ густарид, Шудаст ӯ кунун аз ҷаҳон нопадид. Аз ин пас фиристам ба шоҳ огаҳӣ Зи рӯзе ки бошад маро фарраҳӣ. Бар он нома-бар мӯҳри заррин ниҳод, Фиристод наздики Ковус шод В-аз он пас биёмад, ба шодӣ нишаст, Паричеҳра пеш-андарун май ба даст. Бибуд то баҳор андаровард рӯй, Ҷаҳон шуд биҳиште пур аз рангу бӯй. Ҳама дашт чун парниён шуд ба ранг, Ҳаво гашт бар сони пушти паланг.