БОЗГАШТАНИ РУСТАМ ВА СӮҲРОБ БА ЛАШКАРГОҲ

Бирафтанду рӯи ҳаво тира гашт, Зи Сӯҳроб гардун ҳаме хира гашт, Ту гуфтӣ зи ҷангаш сиришт осмон, Наёсояд аз тохтан як замон. Дигарбора зер-андараш оҳан аст, Шигифтӣ равон асту рӯинтан аст. Шаби тира омад сӯи лашкараш, Миён суда аз ҷангу оҳан бараш. Ба Ҳумон чунин гуфт, к-«Имрӯз ҳур Баромад, ҷаҳон кард пурҷангу шӯр. Шуморо ба сар з-он савори далер, Ки ёли ялон дошт, чанголи шер, Чӣ омад? Шуморо чӣ гуфту чӣ кард? Ки ӯ буд ҳамзӯри ман дар набард. Чӣ кард ӯ або лашкарам сар ба сар, Ки чун ӯ надонам ба гетӣ дигар? Яке пирмард аст бар сони шер, Нагардад зи ҷангу зи пайкор сер. Надонам ба гирди ҷаҳон сар ба сар, Кӣ бандад гаҳи кина чун ӯ камар.» Бад-ӯ гуфт Ҳумон, ки фармони шоҳ Чунин буд, к-аз эдар наҷунбад сипоҳ. Ҳама кори мо сахт босоз буд, Ба овардгаҳ гаштан оғоз буд. Биёмад яке марди пархошҷӯй, Бад-ин лашкари гашн бинҳод рӯй. Ту гуфтӣ, зи мастӣ кунун хостаст, Ки ин ҷангро як тан оростаст. Зи ҳар сӯ пароканда гарди набард, Зи лашкаргаҳи мо басе кушт мард. В-аз он пас бад-он лашкари хеш рӯй Ниҳоду ҳаме рафт дар пӯяпӯй! Чунин гуфт Сӯҳроб, к- «Ӯ з-ин сипоҳ Накард аз далерон касеро табоҳ. Аз эрониён ман басе куштаам, Заминро ба хун чун гил оғуштаам. В-аз ин бар шумо ҷуз назора набуд, Валекин наёмад касе худ, чӣ суд?!