БАХШ КАРДАНИ ФАРИДУН ҶАҲОНРО БАР ПИСАРОН

Нуҳуфта чу берун кашид аз ниҳон, Басе бахш кард Офаридун ҷаҳон. Яке Руму Ховар, дигар Турку Чин, Севум Дашти Гурдону Эронзамин. Нахустин ба Салм - андарун бингарид, Ҳама Руму Ховар мар ӯро гузид. Бифармуд, то лашкаре баркашид, Гурозон сӯи Ховар андаркашид. Ба тахти каён андаровард пой, Ҳаме хондандиш ховархудой. Дигар Турро дод Туронзамин, В-аро кард солори туркону Чин. Яке лашкаре номзад кард шоҳ, Кашид он гаҳе Тур лашкар ба роҳ. Биёмад, ба тахти меҳӣ барнишаст, Камар бар миён басту букшод даст. Бузургон бад-ӯ гавҳар афшонданд, Ҷаҳонпок туроншаҳаш хонданд. В-аз он пас чу навбат ба Эраҷ расид, Мар ӯро падар шаҳри Эрон гузид. Ҳам Эрону ҳам Дашти Найзаварон, Ҳамон тахти шоҳиву тоҷи сарон Бад-ӯ дод, к-ӯро сазо дид гоҳ, Ҳамон теғу мӯҳру нигину кулоҳ. Саронро, ки буд ҳушу фарҳангу рой, Мар ӯро чӣ хонданд? Эронхудой. Нишастанд ҳар се ба орому шод Чунон марзбонони фаррухнажод.