Бутпарастонем, бо ислом моро кор нест

Бутпарастонем, бо ислом моро кор нест, Ғайри тори зулф моро риштаи зуннор нест. Беш аз ин, эй ақл, бар ман таъни расвоӣ мазан, З-он ки мастони муҳаббатро маломат ор нест. Ҳамдаме гар нест, эй дил, рӯзи меҳнат гӯ мабош, Мунисе зиндониёнро беҳтар аз девор нест. Ошноёнро чӣ пеш омад, мурувватро чӣ шуд? К-аз вафову ошноӣ дар ҷаҳон осор нест! Лаззати дарди мурувватро зи бедардон мапурс, Қадри сиҳҳатро надонад, он ки ӯ бемор нест. Субҳдам боди сабо мегуфт бо мурғи чаман: Ноларо таъсир набвад, гар дили афгор нест. Зодаи дардему аз хуни ҷигар парвардаем Коҳҳои ғам агар ояд, ҷаве озор нест. Махфиё, гар васл хоҳӣ, бо ғами ҳиҷрон бисоз, К-андарин гулзори олам як гули бехор нест.