Ҳеҷ шаб тири ғамат бар дили шайдо нарасад

Ҳеҷ шаб тири ғамат бар дили шайдо нарасад, Ки фиғонам ба маҳ, оҳам ба Сурайё нарасад. Он, ки васли ту з-имрӯз ба фардо андохт, Дорам уммед, к-аз имрӯз ба фардо нарасад. Санг бар синазанон мераваду нолакнон Сел аз он бим, ки ногоҳ ба дарё нарасад. Аз дами пир талаб чошнии ишқ, ки баҳр Рашҳи ӯ бе мадади абр ба саҳро нарасад. Меҳнати бодия каш, гар ҳаваси Каъба кунӣ, Кас бад-ин айши муҳанно ба таманно нарасад. Ҳиммати хеш қави дор, ки мурғи дили ту Ҷуз бад-ин бол ба сарманзили анқо нарасад. Нафхи рӯҳулқудус аз ҳар мутанаққис маталаб, Нузли ин файз ҷуз аз хони Масеҳо нарасад. Ҳар чӣ дар вақт расад, бош ба он хуш, Ҷомӣ, К-он чӣ дар пардаи ғайб аст, расад ё нарасад.