Он парипайкар чаро аз суҳбати мо мерамад?
Он парипайкар чаро аз суҳбати мо мерамад?
Ин қадар з-афсуну ваҳшат бе сару по мерамад?
Аз ҳаёи орази гулгуни он мастонагард
Дар дили мино чу соғар мавҷи саҳбо мерамад.
Он қадар ваҳшат дар ин кулфатсаро гул кардааст,
К-аз хаёлаш дар адам тасвири анқо мерамад.
Рабти ҳастӣ як мижа фурсат надорад имтидод,
Аз шарар то рӯшноӣ гашт пайдо, мерамад.
Субҳи содиқ ҳамдами хамёзаи шом аст бас,
З-ин дами кулфатбақо шахси таманно мерамад.
Бо бузургон саҳл набвад шеваи тарки адаб,
Сомирӣ з-ин хислат аз Ҳоруни Мӯсо мерамад.
Некро бад мешуморад мардуми беимтиёз,
Аблаҳи шайтонпараст аз марди доно мерамад.
Айб набвад, гар насозад Ҳоҷӣ бо кас ихтилот,
Дида аз танҳо алам з-он рӯзи танҳо мерамад.