958. КУШТАНИ ХУСРАВ БИНДӮЙРО БА ХУНИ ПАДАРАШ ҲУРМУЗД
В-аз он пас ба ором биншаст шоҳ,
Чу бархост Баҳроми ҷангӣ зи роҳ.
Надид аз бузургон касе кинаҷӯй,
Ки бо ӯ ба рӯй андароранд рӯй.
Ба дастури покиза як рӯз гуфт,
Ки «андеша то кай бувад дар нуҳуфт?
Кушанда падар ҳар замон пеши ман
Ҳаме бугзарад, ӯ бувад хеши ман.
Чу равшанравонам пур аз хун бувад,
Ҳаме подшоҳӣ кунам, чун бувад?!»
Ниҳоданд хону мае чанд х(в)ард,
Ҳамон рӯз Биндӯйро банд кард.
В-аз он пас чунин гуфт бо раҳнамой,
Ки «ӯро ҳам акнун зи тан дасту пой
Бибурред, то ӯ ба хуни каён,
Чу бедаст бошад, набандад миён».
Буриданду ҳам дар замон ӯ бимурд,
Пур аз хун равонаш ба Яздон супурд.