Масти ишқам, порсоӣ чун кунам?

Масти ишқам, порсоӣ чун кунам? Маҳв гаштам, худнамоӣ чун кунам? Оқилон гуфтанд: - Баргард аз ҳабиб, Ошиқам ман, бевафоӣ чун кунам? Ақл фармояд: - Зи дилбар шав ҷудо, Ман зи ҷони худ ҷудоӣ чун кунам? Васли ӯ дидам, надорам тоби ҳаҷр, Салтанат кардам, гадоӣ чун кунам? Ҳаст ҳусну хулқи ӯ бо ҳам ғариб, Бо ғарибон ошноӣ чун кунам? Мурғи ҷонро чун ҳавои ишқи ӯст, Ман бад-ин ҷони ҳавоӣ чун кунам? Носиро, ҳиҷрон ҳам аз ҳукми Худост, Чораи ҳукми худоӣ чун кунам?