Мо сарири салтанат дар бенавоӣ ёфтем,
Мо сарири салтанат дар бенавоӣ ёфтем,
Лаззати риндӣ зи тарки порсоӣ ёфтем.
Солҳо дарюза кардем аз дари соҳибдилон,
Мояи ин подшоҳӣ з-он гадоӣ ёфтем.
Ҳиммати мо аз сари суратпарастӣ даргузашт,
Лоҷарам дар мулки маънӣ подшоӣ ёфтем.
Партави шамъи таҷаллӣ бар дили мо шуъла зад,
Ин ҳама нуру зиё з-он рӯшноӣ ёфтем.
Суҳбати майхорагон аз хотири мо маҳв кард
Он кудуратҳо, ки аз зуҳди риёӣ ёфтем.
Пеш аз ин дар сар ғурури сарфарозӣ доштем,
Тарки сар кардему з-он заҳмат раҳоӣ ёфтем.
Гарчи осеби фалак бишкаст моро чун Убайд,
Аз дарунҳои бузургон мӯмиёӣ ёфтем.