Дубора қудрати парвоз медиҳӣ ё не,
Дубора қудрати парвоз медиҳӣ ё не,
Ба арғунуни куҳан соз медиҳӣ ё не.
Ало зи рашҳаи ин Замзами ниҳон огоҳ,
Лабони замзамапардоз медиҳӣ ё не.
Ҳазор «не»-ву «ҳа»-и ман ба ҳам биёвезанд,
Сиришти куфрбарандоз медиҳӣ ё не.
Даме, ки оина ҳукми завол мехонад,
Ту бар аҷуз ҳам эъҷоз медиҳӣ ё не.
Маро ба маъракаи офтоб мехонӣ,
Дубора шавқи фалактоз медиҳӣ ё не.
Барои анҷумани навбаҳори оянда,
Ту бар вакилиям овоз медиҳӣ ё не.
Ба зиндагӣ - ба муҳаббатгаҳи хиёнатпеч
Бигӯ, бигӯ, ки маро боз медиҳӣ ё не.