Моем аҳли нокуҷо сад аср ё як сония,
Моем аҳли нокуҷо сад аср ё як сония,
Афтода дар меҳмонсаро сад аср ё як сония.
Аз ибтидо то интиҳо в-аз мунтаҳо то мубтадо
Будаст тӯли рафтуо сад аср ё як сония.
Хеле дақиқ омӯхтам ман фурсати парвозро
Дар вусъати вақту фазо - сад аср ё як сония.
Маҳтоб су-су мезанад, хуршед паҳлӯ мезанад
Бо ҷазбаи оламрабо сад аср ё як сония.
Бисёр кам в- аз ҳад фузун, гаҳ сарфарозу гаҳ забун
Мо зистем, эй ошно, сад аср ё як сония.
Ҳангоми рӯ бар рӯ шудан, ку ҳиммати дилҷӯ шудан,
Гӯем аз обу ҳаво сад аср ё як сония.
Обу ҳавои гил дигар, обу ҳавои дил дигар,
Ин ҳар ду восил ё ҷудо сад аср ё як сония.
Ҳар ғунчаи навбозро, ҳар сунъи санъатсозро
Гӯям дуо, гӯям дуо сад аср ё як сония.
Будему бошем, эй ҳабиб, аз таъми ҳастӣ хушнасиб
Дар сояи фазли Худо сад аср ё як сония.