ГУФТОР ДАР СИФАТИ ШЕЪР ВА ТАБЪ
Зи дил биггзор, Ҳуҷҷат, шоириро,
Ки кардӣ ошкоро соҳириро.
Суханҳоят ҳама сеҳри ҳалол аст,
Басе покизатар з-оби зулол аст.
Вале ӯро макун чун Бадр дар абр,
Ки зери абр надҳад равшанӣ Бадр.
Мабар бар даргаҳи шоҳу вазираш,
Зи ислоҳи ҳакимон кун мунираш.
Набинад дида з-ин сон шеъри дилбанд,
Ки бошад зевари ӯ ҳикмату панд.
Баҳояш ҳаст мулки ҷовидонӣ,
Ту мафрӯшаш ба зарру сими конӣ.