Ғазали сурудвора ба яке аз хонандагони Бухоро

Он моҳ ба мо чеҳракушо шуд, чӣ баҷо шуд! З-оинаи мо рангзудо шуд, чӣ баҷо шуд! Бо сарви қадаш қумрии дил роҳнамеёфт, Шамшоди қадаш ҷилванамо шуд, чӣ баҷо шуд! Фарҳод дар ин кӯ ҳи вафо теша ба сар зад, Хусрав ба сари кӯ ҳи ҷафо шуд, чӣ баҷо шуд! Маҷнун, ки дар ин дашт ба вайрона ватан кард, Лайлӣ, ки ватан-хайманамо шуд, чӣ баҷо шуд! Ин оҳу фиғонам зи фалак то ба фалак рафт, Ин наъра куҷо то ба куҷо шуд, чӣ баҷо шуд! Билқис, ки аз мулки Сабо сӯйи Сулаймон, Дар лаҳза ба тақдири Худо шуд, чӣ баҷо шуд! То шамъи рухат аз дили ман зангзудо шуд, Оинаи ман нуру сафо шуд, чӣ баҷо шуд! Хокистари мо бар сари гардун алам афрошт, З-оинаи дил рангзудо шуд, чӣ баҷо шуд! Ҳошо, ки вуҷудам ҳамагӣ сӯхт зи ҳиҷрон, Ин хона ҳама нуру сафо шуд, чӣ баҷо шуд! Лабрез шуд аз шишаи май ҷоми ҳарифон, Якранг ҳама шоҳу гадо шуд, чӣ баҷо шуд! Овози дафу чанг чунон рафт бар афлок, Ғавғои фалак нестнамо шуд, чӣ баҷо шуд! Шоми ману субҳ идами ағёр баробар, Тақсим аҷаб адлнамо шуд, чӣ баҷо шуд! Сарсабз нашуд ин чаман аз дидаи сероб, Селоб магар офати ҷону дили мо шуд? Хун гашт дилу то ба камингоҳи адам рафт, Якранг ҷигар омаду то нестнамо шуд. Фарҳод дар ин кӯ ҳ ба сар тешаи худ зад, Хусрав ба куҷо рафтаву Ширин ба куҷо шуд? Рафтем, зи мо ҳеҷ асар нест ба даврон, Олам ба чӣ сомон шуд(а) аз мо, ки ҷудо шуд. Об аз сари Дониш бигузашт, пой ба гил монд, Ғавғои ҷаҳон бар сари ин бесарупо шуд.