Вабол аст бар мард умри дарозаш,

Вабол аст бар мард умри дарозаш, Чу умри дарозаш фузуд андар озаш. Суи чашмаи шӯрбахтӣ шитобад, Киро оз бошад далелу нуҳозаш. Ҳар он ноз, к-оғози ӯ оз бошад, Мадораш ба нозу махон ҷуз ниёзаш. Ба нозе, к-аз ӯ дигаре ранҷа гардад, Чӣ нозӣ, ки н-ояд бад-ӯ ҳеч нозаш? Ба хоб андар аст, эй бародар, ситамгар, Чӣ ғарра шудастӣ бад-он чашми бозаш? Гар ӯро зиёни касон суд бошад, Надонад хирадманд боз аз гурозаш. Макун чашм бар бадкуниш бозу гирдаш Магарду машав, то тавонӣ, фарозаш, Ки дар меҳри ӯ кина баста-ст, азеро Ки баста-ст чашми дил ин мӯҳрабозаш. Бидеҳ панду хомӯш якчанд рӯзе Яла кун бад-ин курраи дуртозаш, Ки худ зуд биндозад ин шумкурра Баногоҳ дар чоҳи ҳафтод бозаш. Ҷаҳони фиребандаро нӯш машмар, Ки заҳр аст дар нӯшу ранҷ аст нозаш. Киро дод чизе, к-аз ӯ боз настад? Киро баргирифт ӯ, ки н-афканд бозаш? Ҷаҳон мори бадхӯст, манвозаш аз бун, Азеро насозад-ш ҳаргиз навозаш. Намозат барад, гар-ш хорӣ намоӣ В-аз ӯ хор гардӣ, чу бурдӣ намозаш. Бароҳат шудам ман, чу з-ӯ бозгаштам, Дуруст аст ин қавлу ин аст розаш. Набинӣ, ки чун бозгаштӣ, ба соат Ба роҳат бадал гашт ранҷи дарозаш. Зи гетӣ ҳазар созу бо ӯ даволак Мабозу бурун кун дил аз чанги бозаш. Дил аз роҳи дунё ба дин бозгардон, Зи илму амал ҷӯй зоду ҷиҳозаш. Кунад боз ҳаргиз магар дасти тоат, Дареро, ки карда-ст исён фарозаш.