ШАВҚ
Инак, инак, лаҳзаи дидор шуд наздик,
Лаҳзаи дидори фарзанди фирорӣ аз ҳарими модари бемор шуд наздик.
Хуни шарму шавқ дар рагҳои ман ҷорист,
Шавқ гӯяд:
Гомҳоро тезтар бардор.
Шарм гӯяд:
Сабр кун охир чӣ бетобист?
Ман миёни шуълаҳои шарму шавқи хеш даргирам,
Шавқ, яъне,
хоки Меҳан,
пои модар,
Ё ки чашми интизори кӯдакеро боз бӯсидан.
Шарм, яъне
Аз паси ин солҳо дурӣ,
Бо кадомин обрӯ боист,
Ҳар якеро ҳол пурсидан.