Номи ман Меҳрубон аст
Номи Хумор — Хумор аст,
Хумори гулхумор аст,
Чунки аз боғчаи мо
Гул меканад доимо.
Номи Гурез — Гурез аст,
Гурези бетамиз аст,
Чунки аз боғча безор,
Баҳри гурехтан тайёр.
Номи Шодӣ — Шодичон,
Шодичонаки гирён,
Чунки гиряд беором
Аз саҳарӣ то ба шом.
Номи Адаб — Адаб шуд,
Адаби беадаб шуд,
Чунки шӯхӣ мекунад,
Мӯйи маро меканад.
Номи ман Меҳрубон аст,
Меҳрубони хандон аст,
Чунки ман меҳрубонам,
Худам инро медонам!