САЙРИ ҚИТЪАҲО
Қитъаҳоро сайр кардам дар ҳавову дар замин,
Сайр кардам, бо баду неки ҷаҳон гаштам қарин.
Неку бад доранд бо ҳам ҷанг,
ҷанги беамон,
Шуд яқинам ҷанги онҳо нест ҷанги охирин.
Нест ҳоло дар дигар сайёраҳо бӯи ҳаёт,
Аз замин парвозҳо дорем сӯи коинот.
Одамиро з-ин сабаб гӯяд замин бо илтиҷо:
Деҳ маро, фарзанд, аз ҳар гуна қасди бад наҷот.
Аз замин беҳтар барои мо дигар сайёра нест,
Беҳтар аз он дидаи моро раҳи наззора нест.
Ҷуз заминро ҳифз кардан аз балоҳои азим,
Аз барои насли инсон ҳеҷ дигар чора нест.