То кай он шӯх маро бинаду нодида кунад

То кай он шӯх маро бинаду нодида кунад, Бишнавад нолаи зори ману нашнида кунад. Чун бигирям бари ӯ фош, зи ман пинҳонӣ Дар рақибон нигарад, хандаи дуздида кунад. Бар замине, ки шавад дида нишони қадамаш, Ҳар кӣ аҳли назар он ҷо қадам аз дида кунад. Ман надорам гилае з-он калаи шоназада, Ҳар чӣ бо ман кунад, он турраи жӯлида кунад. Бархарошида дилам, гӯ, магузар, з-он ки мабод, К-аш хароши дили ман пой харошида кунад. Пардаи зоҳиди солус барандохта бод, Бо бутон чанд назарбозии пӯшида кунад. Ҷомӣ, аз ёри писандида чӣ ранҷӣ, ҳошо, К-он писандида ба ҷуз кори писандида кунад.